Kevväilä
ja kesälä 2009 Tornionlaakson teatterin pärsunaali oon ollu matkassa
monessa kesäteatterissa.
Ulf
Fembro ja Rosmari Barmosse oon olhee matkassa tekemässä suurta
Sotaoopperaa /Krigsoperan Haaparannala. Yli 10 000 kattojaa, hyvät
resensjuunit niin aviisissa ko blogila, siinä menestys, joka oon
historialisen vuen 2009 arvonen, 200 vuotta Tornionlaakson jakamisesta.
Mervi
Jaako, Mary Calla, Lars-Erik Rantatalo, Niklas Rautio, Berith Roth ja
Barbro Nygård oon tehnee työtä Pajalassa kesäteatterin Emmä Met Maksa/Vi
betalar inte parissa. Sen ohjasi meän lääninohjaaja Catherine Parment,
joka onnistu kehittämhään fantastisen farsinäyttelemisen meän
mahtavitten teatteriamatööritten puolesta ja esityksissä
markkinaviikola Pajalassa oli paljon tytyväisiä ja arvostavia kattojia.
Toivottavasti met saatama antaa jonku esityksen tyrneelä alkusysksystä!
Lopuksi
met kans olema matkassa Juppin musikaalissa Raju Baari ko meän Lars-Erik
Rantatalo ja joitaki laitheita oon siinä myötä, se oon esitys jossa oon
niin musiikkia ko komiikkia meän rakhaasta Tornionlaaksosta.
Kyse
oon, olemako met koskhaan tehnee enämpää yhtenä kesänä ja oonko mikhään
teatteri saanu niin paljon aikhaan niin vähälä väelä. Mutta semmosta
se oon Tornionlaaksosssa – täälä kulttuuri merkittee jotaki!
Nyt
met otama semestin ja tulema takasi 17 pv augusti-/elokuuta! Näemä
silloin!
foto: Mervi Jaako
Rajubaari
foto: Ulf Fembro
Sotaooppera/Krigsoperan
foto: Kjell Kangas