KAINOS SÅNG - KAINON LAULU

Kainon laulu oon tosi tarina. Kaino oon yks niistä suomalaisista lapsista jokka jou´uit lähtemhään pakhoon toista mailmansottaa, yksin, ilman mammaa ja pappaa, Ruothiin. Hänen tarinan oon dramatiikkeri ja ohjaaja Urban Lindh, dramatiseeranu. Ko näytelmällä oli ensi-ilta kakskymmentä vuotta sitte ja ko Kainon oma tyär Carina oli päärollissa, se valithiin sen vuen parhaaksi näytelmäksi.

Sen jälkhiin sitä oon pantu seenile ja pelattu monta kertaa. Nyt oon Tornionlaakson teatterin vuoro työstää näytelmää. Mervi Jaako pellaa Kainon rollia, ja hänen monikielisyys passaa hyvin tähän näytelhmään, joka kertoo niin paljon kielestä ja identtiteetistä. Markus Forsberg oon niitten ihmisitten rollissa joita Kaino kohtaa, aina Kainon mammasta kasvatti­vanhemphiin Ruottissa. Janine Höhe oon matkassa muusikkonna, ja musiikin oon säveltänny Ewa Granath-Wigardt.

Teatterin johtaja Ulf Fembro vastaa ohjauksesta ja hänen työ ennen tätä oli Sotauuppera jonka seeni oli 100x40 meeteriä. Nyt seenialue oon 2x3 meeteriä ja yleisö pääsee rohki likele näytelmää. Seenin ulkonäöstä ja vaatheista vastaa Claes Wiberg Stockholmista.

Tornionlaakson teatterin tuottajaryhmässä oon Lars-Erik Rantatalo, Berith Roth ja Mary Calla. Viimeksi mainittu oon kans tehny tokat/nuket jokka kuvvaava Kainon pienempiä veljiä.

Esitys näytethään kaikile kahtheentoista ikävuotheen saakka oleville lapsile Tornionlaakson kouluila.  

KUVAT