Visjuuni:

Toiminta:

Priuriteerinkit:

Ko kattoo viimisitten vuositten kulttuurikehitystä Tornionlaaksossa, oon helppo puhua räihäyksestä. Aina useamat väylänvarressa tuottava erilaisia taitheelisia esityksiä ja prujektia musiikin, filmin ja näytelmitten parissa. Tornionlaakson teatteri täytti kakskymmentä vuotta vuona 2006.

  Kaikki alko siittä ko teatterista, musiikista ja kielestä kiinostunheita nuoria kohtasit läänin­ohjaajan Ulla Lytkensin ja alethiin käyttämhään meänkieltä näyttämöllä/seenilä. Nyt näkkee ette se raami jonka teatteri sai aikhaan, oon ollu rohki luova maaperä monele ihmiselle ja toiminalle.

Tornionlaakson teatteri oon hyvä esimerkki uuen tyyppisestä laitoksesta.

  Ko oon ollu kyse näyttömöltä esitetystä taitheesta Ruottissa, se oon aina ollu proffsitten/ ammattilaisitten tekemää. Mutta viimisitten vuositten aikana oon selvästi nähty, ette onnistu­nutta teatteritoimintaa saattaa syntyä juuri sillä mallin ette proffsit ja amatöörit kohtaava, justhiinsa niinku Tornionlaakson teatteri oon toiminu.

  Oon Ruottissa muitaki teatteria jokka voisit olla tässä esimerkkinä siittä jota kansanvälisesti kuttuthaan ”community theatre”, teatterit joila oon pieni ryhmä  proffsia jokka omitten prujektitten kautta merkittevä paljon muule yhtheiskunnale, ja sen lisäksi ette siittä syntyy luovuutta ja se antaa taitheelista inspirasjuunia, monet tärkeät sosiaaliset tarkotukset täyttyvä. Tämmöset teatterit jäävä Ruottissa kuitenki helposti olemassa olevan tukisysteemin ulko­puolele, sillä ko valtio ei vastaa toiminasta jossa amatööri- ja proffsikulttuuri kohtaava. Semmosen toiminan vastuu jääpi kunnile, ja niitten ekonoominen tilane oon, niinku met kaikin tiämä, ussein rohki huolestunnu.

Tässä Tornionlaakson teatterin onni oon ollu, ette met kuuluma minuriteetti-aluheesheen, ja juuri sen takia valtion tukea oon ollu maholista saa.

  Ko kulttuurisatsauksitten ekonoomista arvoa mittaa, häätyy löytää keinoja ette ymmärtää mitä pusitiivisiä vaikutuksia itteluotola, ittensä ymmärtämisellä, toishiin ihmishiin luottamisella, kulttuurisella identtiteetilä ja kreatiivisitten voimitten kehittämisellä oon yrittäjyyele ja sille ette vasthuulisesti osalistuu yhtheiskuntatyöhön.

Tornionlaakson teatteri jatkaa työtä ja met toivoma ette siihen ei kulu kovin paljon aikaa ennenkö valtio, maakäräjät/landstingi ja kunnat saava maholisuuen perustaa proffsi­yhtheisönki eli -ensembleen meänkielen aluheele.

Kotirannan Väki/Hemsöborna

Vittangi 14 juli 2006

Lassinanti-revyn, Pello maj 2005

Vittula-upplevelsen september 2004